Vrienden van de Streektaal Lochem

Activiteiten

Zundag 15 oktober 2017: Koffiemorgen


15 oktober j.l. was de eerste koffiemorgen van ’t nieje seizoen en ok de eerste koffiemorgen zonder Dinie Hiddink. Joop Hekkelman hef eur herdach met de volgende weurde:



“Op slag zag de waerld der anders uut. Dinie, onze veurzitter is op 25 juli uut de tied ekommen. 

Veur onze vereniging is Dinie van grote betekenis ewes. Zee was in 1978 ene van de oprichters. ‘n Paar jaor later wodden zee veurzitter en dat is zee töt de letste dag ebleven. Veural in de beginjaoren ontpoppen zee zich as veurvechtster veur ‘t behold van de Nedersaksische taal. In nostalgische bewoordingen, dee-t weemoed verraon, vertellen zee mangs aover de beginjaoren van ‘t Sont en de contacten dee dat opleveren töt wied vot, in ‘t Groningse land. Alles ston ton in ‘t teken van: de streektaal ‘meer anzeen en ‘n bettere status bezörgen. Met ‘t klimmen van de jaoren bekeek zee de ontwikkelingen op dat vlak wat meer beschouwend.


Dinie zat in de beginjaoren vol met ideeën as ‘t ging um verenigingsactiviteiten. Dee allemaole de revue laoten passeren kost tevölle tied. Maor de Streektaalmarkt en de Gaodag, dee jaorenlang wodden ehollen bie Bousema en Erve Brooks, bunt daorvan anspraekende veurbeelden.


Zee was ok ‘n mensen mense. Op drukke verenigingsbi’jeenkomsten zörgen zee derveur dat de lu dee minder mobiel waren, begeleid wodden naor ‘n plaatse met good zicht op ‘t podium. Elk bestuurslid kon op zien verjeurdag de postbode verwachten. Den bezörgen dan ‘n kaarte met eur handgeschreven felicitaties.


In discussies en gesprekken aover de tokomst van de onze vereniging waken zee derveur dat de belangen van de olderen onder ons neet onder ‘t vloerkleed wodden evaegd.  Alles hef zien tied en de veranderingen gaot soms in rap tempo vedan. Zee zag de noodzaak um te veranderen richting de behoefte van nieje generaoties. Maor ‘vrogger’ löslaoten dat was veur eur nog neet zo makkelijk.

Wiej hebt Dinie ekend as iemand dee veur zichzelf en op eur eigen meniere daorin ‘n balans vond. Maor den modernen computer bleef ‘n plaoge. Dat dink, zo as ze dan zae: is nooit ‘n kammeraod ewodden um gemak van te hebben. 


Dinie was veural bekend um eur vertelkunst. In necrologieën dee-t in de tied van eur aoverlieden verschenen, wodden eur schrieverschap eroemd. Maor ik denke dat ze an de meniere waorop zee ‘n verhaal vertellen en daor kleur an gaf, de grootste bekendheid hef te danken. Meer dan 50 jaor ston zee op de planken en trok zee ‘t land in um verhalen te vertellen. Streektaal en de streekcultuur vormen daorbie de rooie draod. Vanuut eur eigen emotie wis zee eur publiek in ‘t hatte te raken.


In Lochem is op 25 juli 2017 ‘n inspirerende streektaalambassadeur verloren egaon.

Onze vereniging is ‘n gezichte kwiet eraakt dat der onlösmakelijk met verbonden was. Wiej gaot eur missen. In alle opzichten”.



Doornao bunt wielle met mekare een minuut stille ewes.


Joop Boxstart zei in zien inleiding, dat ok hee verscheidene keren met Dinie had op-etreden.

Joop Boxstart en John te Dorsthorst hebt der een helen mooien margen van emaakt. De leu zatten aodemloos te luusteren um de teksten good te können verstaon. Dat John een echte geluudsman is, werd al gauw dudelijk, want zowel zang as meziek waren van geweldige kwaliteit.

In 2014 hef Joop Boxstart De Gelderse Kleiroze ewonnen met ’t leedje “In de fles” en gelukkig kwam dat ok veurbie.

Met een good gevuul bunt de anwezigen naor huus of elders egaon um ok nog van de mooie zommerse dag te können genieten.

















        Joop Boxstart                                                                     John te Dorsthorst







































Terug