Joop Hekkelman uut Gorssel hef een beuksken uut ebrach met de dialect columns dee-t e in de periode meert 2020 t/m juli 2021 schreef veur waekblad "De Gids". Met de titel, Iej mot toch wat, refereert hee an anderhalfjaor coronatied waarin wiej meuizaam op zeuk gingen naor zinvolle besteding van onze tied.
Hekkelman publiceert al sinds jaor en dag verhaaln en columns, zowel in de Streektaal as in ‘t Nederlands. Um dichte biej zien moderspraoke te blieven neumt hee ‘n column lever ‘n stuksken. In ‘t beuksken bunt alle 62 stukskes uut de coronaperiode op-enomen. Ina Klomp-Meijer, bekend as illustratrice van kinderbeuke, hef met ‘n antal fraoie tekeningen de inhold ‘n extra accent met-egeven.

De onderwerpen dee-t an bod komt bunt divers, neet specifiek op corona ericht en aoverstijgt ‘t verspreidingsgebied van De Gids. De coronacrisis löp as ‘n rooie draod met, maor de onderwerpen gaot van yoga op ‘n matje töt dooie ringslengeskes op ‘n zandweg en hondenpoep, en van MRIJ beeste töt de gevolgen van dreuge zommers. De instaek van de stukskes is afwisselend serieus, humoristisch en hier en daor ontbrek ok de zelfspot neet.

‘t Beukske is te koop bie de boekhandels Bechtle in Gorssel en Lovink in Lochem. Wieter is ‘t verkriegbaor biej Spar Vrielink in Harfsen, De Winde in Harfsen, De Stempelwinkel in Eefde, Supermarkt Centerrr in Almen, Supermarkt Centerrr in Barchem en Marskramer in Laren. Bestel iej lever via internet dan kö-j terechte bie de webwinkels: www.achterhoekseboeken.nl en www.dialectkring.nl.
"Iej mot toch wat" telt 76 pagina’s en kost € 9,95.