Twiefel

26-08-2022
Joop Hekkelman

Worsteln met oew identiteit, met wee o’j bunt of wilt waen, kan ’n gevecht waen, met oezelf of met oew umgeving. Dat gevecht kan ingriepende gevolgen hebbm, a’j in cirkels blieft ronddraejen en der neet meer uutkomt. Dat is de binnenkante van de mens, onzichtbaar en mangs onbereikbaar.

Identiteit kent ok ‘n vorm van uterlekheedn: mooie klere of juust neet, een dure auto of een tweedehandsje, elke waeke naor de kapper of um de zes waeke. Imago en onzekerheid spölt dan ‘n rolle en ok ‘t verlangn bie ‘t onbekende te willn heurn. De vraoge is dan: waorbie? A’j dat zeker weet is der gin probleem. Twiefel iej, dan bungel iej elken keer van ‘t ene been naor ‘t ander en wee’j neet meer waor a’j an too bunt.

Kots leep ik op de camping teegn zon gevalletje an van taalonzekerheid.
Onze buurn heurn ik met mekare plat Twents praoten. Hee dudelek en aovertugend, zee gooien der nogal wat hooghollands in oosteleke tongval deurhen. Ton ik eur ansprokke in dialect kree’k antwoord in ‘t Nederlands. De twiefel had zien plaetsken in enomm. Zee wol veur de butenwacht neet togeevm an eur moderspraoke. A’j tegenaover ‘n vremden neet wilt weetn waor of iej vandan komt dan kö’j toch praoten van ‘n identiteitscrisis dunkt miej.

Misschien dech ze dat eenheid in taal de niejste mode is, maor dan volgt ze de ontwikkelingen op dat vlak slech. Wieter dut ze volop met an de trends van de saammlaeving. Dat zee’k an eur moderne coupe, dén rood-peers van kleur is en an alle kanten op-eschoorn. Zee wacht gin maond um weer naor de kapper te gaon.

Wat is dat toch, dat getwiefel aover de taal van oew afkomst. Laot voluut heuren waor a’j vandan komt. Oew tongval verrödt toch wel da’j gin spraeker bunt in zuver Hollands; at dat al besteet. Van halfbakken gedoote wodt gin mense gelukkeg.

A’w onderweg luu heurt praoten dan make wiej der nog wel ‘s ‘n soort kwis van en gao’w raonn waor of de persoon in kwestie vandan kump. De ontdekking van de diversiteit gif ‘n gevuul van trots op ‘t aegene. Gewoon doon den moderspraoke.

Joop Hekkelman
bron: De Gids, week 34, 2022


 Dialect