Oranjegeveul

19-07-2021
Joop Hekkelman

Wat was der lange naor uut ekeken. Samen weer ’s in de kroeg naor voetballen kieken. Der mag weer van alles, en dat nog wel tiedens ‘t Europese kampioenschap voetballen. Wiele worden kampioen, dat was ‘n zekerheid en dat mo’j met mekare vieren, ‘t leefste in ‘t café. ‘t Is zundagaovend, iederene zit klaor in oranje, nao ‘t tweede drankje is van anderhalve meter gin spraoke meer. Dan komme wiej achter met 1-0 en later met 2-0. ‘t Drinken van plezeer wodt innemmen van ellende, maor ondanks de tegenslag blif de stemming der inzitten, ‘t mag weer.

Zelf zitte wiej op ‘n verjeurdagsvisite en praot nao aover de pak slag dee’w kregen van de Tjechen. Der wordt nuchter aover espraoken, want wiej doot disse visite traditioneel, met koffie en gebak en umdat ‘t zundagaovend is met ‘n paar glaeskes fris. Ok bie ons is de kritiek neet mals, wiej weet met mekare precies wee van de spöllers hef verzaakt. In dat opzicht is der gin verschil met de kroeg, oranjegeveul is van ons allemaole; ‘t is ‘n gemeenschappeleke belaeving. Bie ons was ‘t voetbalgesprek met ’n half uur veurbiej. Ho dat an de tap ging weet ik neet, want daor was ik neet bie.

Later op den aovend, ‘t leep tegen elf uur, stappe wiej op. Op de stoepe stao-w nog effen te praoten a’w in wiedte ‘n vrouwspersoon zeet ankommen. Zee schommelt van links naor rechts en grep zich hier en daor vaste in ‘n hegge of an ‘n boom, um aoverende te blieven. Met mäöjte laveern ze tussen ons deur um ‘t achterpad in te bungeln, zee zae niks, of ze ons zag was neet dudelek. De nationale vlagge met leeuw had ze um zich hen eslagen; ‘n groot voetballeefhebber dus. Gelukkeg hef ze steun an de stevege muren langs ‘t pad. Wieterop mo’w met ‘n baoge um ‘n jonge man hen den neet genog hef an anderhalve meter stoeptegels. ‘t Mot nog bar gezelleg waen ewes ondanks de tegenslag.

Wat ik mien den anderen dag afvroge was; ho zit ‘t op maondagmorgen met ‘t oranjegeveul? Ik vermoe:d grote verschillen, maor ik gao der neet naor vraogen.

Joop Hekkelman
bron: De Gids, week 27, 2021


EK 2021