Kóns ston der ’n artikel in de regionale krante aover de Achterhoek Monitor. Dat ging aover ciefers mbt bewoners, elektrische auto’s, de weerde van de huu:ze, vacatures, enzovoort. Ik dache: door gao’k, letterlek, ’s effen goed veur zittn. Bie de tweede alinea ha’k ‘m figuurlek metene al flink zittn. Zaos vaker komt Lochem en Zutphen neet veur in zo’n verhaal aover de Achterhoek, en ok Montferland en Doesburg neet. De Achterhoek betekent veur de Monitor dee andere zeuvm gemeenten. ’t Is gin niejs da’w der maor ’n betjen bie anhangt in relatie töt ’t begrip Achterhoek. Bestuurlek heure wiej bie de Cleantech Regio (sinds 2016) en in cultureel opzicht ontbrek ‘t an samenhang. Hoo geerne wiej ok bie de Achterhoek van Normaal wilt heuren en de greune vlagge wilt laotn wappern: ondudelekheid is troef.

In 1668 schreef de Eibergse dominee Sluiter in één van zien gedichten “Waer iemant duisend vreugden soek/Mijn vreugt is in dees’ achter-hoek”. Dooruut is ooit concludeerd dat e de Achterhoek bedoelen zoas wiej den noe in de volksmond kent, ’t gebied tussen de Iessel, de Duutse grens, Salland/Twente en de Olde Iessel. Iederene dee studie hef emaakt van Sluiter liekt ‘t der aover eens dat de term Achterhoek wel is af eleid van zien tekst, maor dat hee 350 joor elene wat anders hef bedoeld.

’t Ontbraeken van samenhang tussn de beide gebieden is historisch zo egreuid. Kiek maor ’s naor de niejsveurziening, Noord en Zuud kriegt weineg van mekare met. Dat is gin ramp, maor plak neet naor aegen willekeur ’tzelfde etiket op verschillnde eenheden. ’t Zol interessant waen um te vernemm hoo de bewoners uut alle uuthoeken van ons gezamenleke gebied zich met mekare verbonden vuult in de term Achterhoek. Laot den Monitor daor ’s wark van maken.

Inmiddels hef de bestuurleke saammwarking in onze umgeving de onbegreepm name Cleantech Regio weer truggebrach naor Stedendriehoek. ’t Blif anklungeln wat betreft de vraoge woor wiej aelek biejheurt. Mien achterhoek, de plekke waor ik mien vreugden zuke, zoas Sluiter dat beschreef, lig veur altied in Graafschap Zutphen. Zo he’k dat eleerd op de legere schole met de lessen topografie. Wat 'aegen' is mo’j neet verdoe:zeln.

Joop Hekkelman
bron: De Gids, week 4, 2023