Hommel(e)s

21-06-2022
Joop Hekkelman

Twee nestkasjes. ‘t Eerste nösje mezen is uut evlaogen. In den andern is ‘t ‘n gezoem van jewelste. Insecten kroept in en uut. Wiej könt neet goed zeen welken ‘t bunt, denkt an wespen. ‘t Kasje he’w veurzichteg verplaatst, ‘t bliekt hommels te waen. Onschuldege beesjes. Op de plekke waor-t ze eers stonn, verzamelt zich ‘n flink antal dat nog onderweg was. Zo’n nös mo’j neet meer dan viefteg centimeter verplaatsen, anders raakt hommels ‘t spoor biester en könt ze ’t nös neet truggevinn.

Ik had hier ok ‘n verhaaltje könn schrievm dat ’t hillemaole mis dreigt te gaon met ‘t insectenbestand, umdat iederene zo’n zoemend kasje zonder naodenkn in de fik stek, um der maor vanaf te waen. Hoo’k an dee gedachte komme?
Kots ston der ‘n artikeltje in de krante met ‘n foto van twee vrouwluu bie ‘n perceel bouwland langs ‘n klinkerweg, zee staot op ‘n berm den der wat kaal uutzut. Wee of wat doorvan de oorzaak van is daor kö’j allene naor gissn. De vrouwluu in disse kwestie laot in de krante optekenn: Hier in Lochem maaien de boeren alles plat, gooien er zelfs gif overheen. Um daornao te zeggen dat zee ‘n ‘vermoeden’ hebt dat boeren dat doot. Ze weet ’t dus neet zeker. Dat is dus framing.

De dames suggereert dat alle boeren in de gemeente Lochem maor wat raak knooit met gifspuiterieje en bermbeheer. Ik hebbe respect veur idealisten, maor dit geet te wied. Behalve dat ‘t neet woor is, vergaet ze dat der nogal wat akkerranden (boerengrond) wodt in-ezaeid met bloemmengsels, um biodiversiteit te situmeleern. Dat bunt deezelfde boern! Op de webstae van Lochem Groen! wodt ‘t verhaal enigszins af-ezwakt. Zo ging dat ok met de mening aover ‘t kippmdrama, ‘n half joor elene.

In ons aegen umgeving loopt luu rond dee-t genot hebt an eenziedege en versimpelde beeldvorming van de locale boernstand. Wille wiej in ‘t Lochemse ‘n saammlaeving van wantrouwen en tendentieuze berichtgeving?

‘t Hommelnös steet weer op zien olde plaatse. ‘t Incident is op-elöst; met respect naor beide kanten. Alle betrokkenen bunt tevraene en veult zich weer thuus. ‘t Is der ‘n drukte van belang.

Joop Hekkelman
bron: De Gids, week 22, 2022


 Hommels