Meert is de dialectmaond en dat wodt her en der evierd met ’n feesje. In de Achterhoek verscheen ’t joorlekse kadobuuksen in de Waeke van ‘t Achterhoekse boek. Disse keer met verhaaln en gedichten aover ‘t thema gevuul. Opmerkelek is dat der alle joor meer inzendingn binnkomt, ok van luu dee-t zich nog neet eerder hadden emeld as dialectschriever. Der is dus bliekbaar belangstelling um de streektaal as utingsvorm te ontdekken. ’n Ander onderdeel van de Waeke van dat boek is de verkiezing van ‘t Beste boek van ‘t afgelopen joor. Neet speciaal in dialect, de auteur of ‘t onderwerp mot wat met de regio Achterhoek van doon hebbm.
Ik hadde de eer um ‘n paar genomineerde schrievers te interviewen aover eur boek. Ene dervan was Jos Palm den, Kind van Maria en Mao, ‘t verhaal van ’n generatie, schreef. Met ’n zaal vol babyboomers is ’n onderwerp aover de veranderingen en de vriejheid, of better: de bevriejding uut jorenlang in-esleetn beholdend burgerschap, ’n kadootje. Völle herkenning denk ik; ’t rooie boekje van Mao lag destieds hier en door nog wel ‘s as stil protest op taofel.
De man zelf is volstrekt eerlek aover zien zuuktocht naor vastegheid in ’t laeven. Naor aegen zeggen is e twee keer van zien geleuf evallen. De eerste keer met ’t löskomm van ‘t katholieke milieu van thuus en de tweede keer naodat e teleurgesteld raakn aover de idealen van Marx en Lenin. Uutendelek kwam e der achter dat der aelek hillemaole niks is.
Noe zu’j denken: wat hef zo’n onderwerp met onze regio van doon? Noh, de ideaaln dee Palm in zien jonge joorn naostreevm bunt wellicht neet zo extreem töt uting ekomm in onze umgeving, maor ’t anraakn van dat idealisme is iederene bekend. Op feestjes, onder ‘t genot van nieje muziek en bier, met sfeervolle lempkes onder ’n camouflagenet, is heel wat conservatisme af-ezwoorn en bunt nieje ontdekkingen op ‘t pad van de jeugd ekomm. Activisme, protest, enzovoort door hadden de meesten neet zovölle met, in dat opzicht he’w op ‘t platteland de krante neet vake ehaald. Ik denke dat de meesten ’n warm gevuul hebt aover ehollen an dee tied.
Joop Hekkelman
bron: De Gids, week 11, 2024
