Joop Hekkelman uut Gorssel is al ‘n antal joren actief as docent schrievm in de streektaal, ondere andere bie Ecal (Erfgoedcentrum Achterhoek en Liemers). Uut de basiscursussen dee-t e in Gorssel gaf is in 2019 ‘n ‘schrieversgroep’ onstaon dee ‘n paar keer in ‘t joor bie mekare kump um mekanders wark te bespraekn.

Nieje cursus
Nao de kommende joorwisseling wodt in Gorssel opniej de cursus dialectschrievm an-ebaone. Hoo schrief ie de klankn dee-j heurt, hoo schrief iej de verleden tied en voltooid deelwoorden en nog völle meer. Kortumme, waor mo’j op letten bie ‘t schrievm in de streektaal. Disse kennismaking nemt slechts één dagdeel in beslag. Iederene uut de gemeente Lochem en umgeving kan zich anmelden.
Hef de streektaal oew belangstelling, bu’j op zeuk naor de regionale identiteit en wi’j oe verdepen in de taal den daor biie-heurt, dan mo‘j ‘n keer wat. Kom uut oewn schulp en doo met.

Aover de docent en Iej mot toch wat
Joop Hekkelman schrif en publiceert verhaaln en is deelnemmer an diverse streektaalfora. Kots verscheen ‘n beukesken met zien waekelekse ‘stukskes’ uut De Gids, getiteld Iej mot toch wat. Met illustraties van Ina Klomp.

Dit beuksken kost € 9,95 en is verkriegbaor bie Bechtle in Gorssel, Lovink in Lochem en via de website www.achterhoekseboeken.nl. ‘t Lig ok bie Spar Vrielink en De Winde in Harfsen, De Stempelwinkel Aefde, de supermarkten Centerrr in Almen en Barchem en Marskramer in Laorne.

Anmelden en informatie
Wil iej oe anmelden veur deelname an de cursus of wi’j meer informatie, mail dan naor: opverhaalmetjohan@gmail.com onder vermelding van oew name, adres, woonplaatse, telefoonnummer en emailadres.
De exacte daotum en tied wodt later in aoverleg vast-esteld.
Meer informatie is te vinn op: joophekkelman.blogspot.com